Фондацијата за култура и спорт од Куманово денеска ги презентираше активностите од проектот „Соработка во визуелни уметности за промовирање на регионалниот културен идентитет“ кој заеднички го спроведуваше со партнерите од Банско и Добриниште, Бугарија. Фондацијата е водечки партнер во проектот кој се спроведува од септември, лани.
-Снимавме краткометражен филм „Кината во минатото“ во Куманово, Банско и Добриниште, кој наскоро ќе биде објавен. Преку проектот набавена е и техничка опрема, осветлување, озвучување, проектор и соодветна опрема со која можеме да ги организираме бројните манифестации кои се одржуваат во просториите на Занаетчискиот дом каде е седиштето на Фондацијата, изјави, в.д директорот на Фондацијата за култура и спорт, Марио Арангеловски.
Опремата ќе можат да ја користат и останатите уметници, организации, кои реализираат манифестации во Занаетчискиот дом.
Во рамки на проектот отворена е и веб-страница на која ќе се објавуваат културните манифестации во трите општини. На овој начин, наведуваат од Фондацијата, индиректно се развива туризмот во овие општини. Целна група се и уметниците, работници во културата, во туризмот кои меѓусебе се запознаа на заедничките средби и разменија искуства.
Линк до веб-страницата: project-visualarts-mkbg.org
Вредноста на проектот е 96 илјади евра од кои 85 проценти се поддршка на ЕУ, а националното кофинансирање е 15 отсто.ам/фф/
No comment yet, add your voice below!